香港小姐卸任感言

香港小姐卸任感言，是每屆行將卸任的上屆香港小姐冠軍於頒獎予下屆香港小姐冠軍（2008香港小姐冠軍張舒雅除外）前所說出的一段話。

1985年度冠軍：謝寧

• 宣讀日期：1986年06月01日，香港演藝學院
  • 過去嘅一年，係我人生歷程中最多姿多彩，最值得我永遠懷念嘅一年，響履行香港小姐任務期間，我曾經代表香港參加美國邁阿美舉行嘅環球小姐競選，肩負起親善睦鄰嘅使命，響本港，亦曾經參與好多社會公益活動，呢啲難得嘅經歷，將會響我心裏，永遠留下一頁美麗嘅回憶，過去一年內，我好高興有機會參與幕前演出，包括劇集、司儀及歌舞表演，學到好多新知識，豐富我嘅人生。稍後，我就會將香港小姐嘅責任移交比繼任嘅佳麗，我衷心祝福佢響任內期間有更大嘅成就。最後，我借呢個機會響一年內不斷鼓勵我嘅朋友致萬分嘅謝意。

1986年度冠軍：李美珊

• 宣讀日期：1987年08月09日，香港演藝學院
  • 當選為1986年度嘅香港小姐，對我嚟講可以話係人生嘅轉捩點，係過去一年裏面，我曾經遠赴巴拿馬參加環球小姐競選，認識咗好多來自唔同國家嘅佳麗，而我因為接觸過多國語言，所以能夠同佢地作深入嘅溝通，履行親善大使嘅任務，亦得到咗好多份珍貴嘅友誼，係我在任期間，經常參與社會公益活動。

1987年度冠軍：楊寶玲

• 宣讀日期：1988年08月21日，香港演藝學院
  • 過去嘅呢一年，係我人生歷程中最多姿多彩而又最值得我永遠懷念，喺履行香港小姐任務期間，我曾經代表過香港參加世界小姐競選，得到「亞洲皇后」呢個獎項，參加環球小姐競選嘅時候，我得到第五名，能夠屢次為香港人爭光，呢份榮譽我將會永遠難忘，稍後，我就會將香港小姐嘅任務移交比即將誕生嘅1988年度香港小姐，係呢一度，我衷心咁祝福佢喺任內有更出色嘅表現，將香港人嘅友誼帶到世界每一處，最後，我借呢個機會向喺過去呢一年裏面不斷咁支持我，不斷咁鼓勵我嘅朋友，致萬二分嘅謝意，我衷心咁多謝你地。

1988年度冠軍：李嘉欣

• 宣讀日期：1989年08月20日，香港文化中心
  • 響過去嘅一年，我履行咗香港小姐同國際親善小姐嘅任務，代表香港參加多個國際性選美盛會，並且多次前赴海外，肩負起推廣香港旅遊同貿易嘅使命，籍住交流活動嘅機會，可以分享到國際友誼，呢啲咁有意義嘅任務，充實咗我人生寶貴嘅經驗，今晚新嘅香港小姐即將誕生，我衷心祝福佢繼續發揚香港小姐任務，將香港呢個大都會嘅國際地位更加提升，同埋有更璀璨嘅成就。

1989年度冠軍：陳法蓉

• 宣讀日期：1990年08月18日，香港文化中心
  • 響過去嘅一年，我履行咗香港小姐同埋國際親善小姐嘅任務，代表香港參加過環球小姐，同埋國際華裔小姐嘅競選，並且多次前往海外肩負起推廣香港旅遊業同埋貿易嘅使命，籍住呢啲交流嘅機會，分享國際友誼，提升香港嘅地位，呢啲咁有意義嘅任務，充實咗我生命寶貴嘅經驗。
  • 九十年代第一位香港小姐今晚就會誕生，我喺呢度衷心咁祝福呢位九零新女性，繼續發揚香港小姐嘅精神，與全港市民齊心共創香港新里程。

1990年度冠軍：袁詠儀

• 宣讀日期：1991年06月23日，紅磡香港體育館
  • 係過去嘅一年，我履行咗香港小姐嘅任務，代表香港參加咗國際華裔小姐競選同埋環球小姐競選，並多次前往海外肩負起推廣香港嘅使命，揭盡年力為香港作出咗一點貢獻，同時我亦參加處境喜劇「我愛玫瑰園」嘅演出，呢啲咁有意義嘅任務，充實咗我人生寶貴嘅經驗，今晚新嘅香港小姐即將誕生，我衷心祝福佢繼續發揚香港小姐嘅任務，將香港響國際地位更加提高，同埋佢個人有更璀璨嘅成就。

1991年度冠軍：郭藹明

• 宣讀日期：1992年06月07日，紅磡香港體育館
  • 係過去一年，我曾經以親善大使嘅身分，代表香港參加好多海外嘅國際性盛會，籍著呢啲親善交流活動，宣揚同推廣香港嘅旅遊貿易，以及各方面嘅成就，揭盡香港小姐嘅使命，呢啲咁難忘嘅經驗，作為香港一分子嘅我，可謂永誌不忘。
  • 第20屆香港小姐今晚就會誕生，我衷心祝賀佢嘅當選，同時對呢一切期待佢繼續燃點選美文化，發揚熱愛香港，關心社群嘅香港小姐傳統精神，為提升香港喺國際嘅地位而努力。

1992年度冠軍：盧淑儀

• 宣讀日期：1993年06月06日，紅磡香港體育館
  • 自從響一年前當選成為九二年度嘅香港小姐之後，我就肩負起親善大使嘅使命，負責係香港同埋世界各國宣揚香港，出席國際性嘅選美活動，呢一年可以算係我人生裏面最豐盛、最難忘嘅一個階段，今晚，九三年度嘅香港小姐即將誕生，我衷心咁祝福佢，同時，我亦都好希望佢能夠好好咁把握未來呢一年，實踐香港親善大使嘅每一個任務，成為衝破局限，不再平凡嘅九三年度香港小姐。

1993年度冠軍：莫可欣

• 宣讀日期：1994年06月05日，紅磡香港體育館
  • 一年之前，我懷住興奮莫名嘅心情當選為香港小姐，成為香港嘅親善大使，代表香港到世界各地宣揚香港，協助推廣香港嘅旅遊同埋工商貿易，而係本港，我亦經常出席各項社會公益慈善活動，對香港揭盡本份，同時，我亦代表香港參加國際性嘅選美活動，例如國際華裔小姐選舉，同埋啱啱係菲律賓舉行過嘅環球小姐選舉，參與呢啲活動，令我嘅眼界擴闊不少，而且仲學到好多人與人之間相處嘅心得，我要響度多謝一直愛護同埋支持我嘅好朋友，我要謹記住呢一份咁寶貴嘅友誼㗎，最後我祝福即將誕生嘅1994年度香港小姐，係未來嘅一年裏面有更大嘅成就，將生命中嘅每一頁都編寫得更光輝同埋燦爛。

1994年度冠軍：譚小環

• 宣讀日期：1995年06月04日，紅磡香港體育館
  • 前方匆匆，眨下眼就係港姐決賽之夜，仲記得係舊年嘅今晚，戴上港姐后冠之後，我就開始履行香港小姐嘅任務，我曾經代表香港參加國際性比美活動，以及前往海外宣揚香港，同時，我亦經常參與電視嘅演出，對我嚟講，過去係經歷最難忘同埋充實嘅一年，籍呢個機會，我要衷心多謝各界比我嘅支持同埋愛護，新嘅一屆香港小姐即將誕生，我誠摯祝福佢，繼續發揚港姐服務社群嘅傳統精神，為香港作出貢獻。

1995年度冠軍：楊婉儀

• 宣讀日期：1996年06月02日，紅磡香港體育館
  • 響過去嘅一年，我履行咗香港小姐嘅任務，響海外同埋本地肩負起親善大使嘅使命，同埋參與電視節目嘅演出，尤其榮幸可以主持百年國際體壇盛事，九六亞特蘭大奧運節目，令我充實體驗人生，鄺闊視野，實在係獲益良多，銘記心坎，今晚，新嘅香港小姐即將誕生，我衷心祝福佢繼續發揚香港小姐嘅優良傳統精神，響未來嘅一年，踏上燦爛星光大道，為香港帶嚟更美好嘅明天。

1996年度冠軍：李珊珊

• 宣讀日期：1997年07月13日，紅磡香港體育館
  • 自從當選咗香港小姐之後，o響過去嘅一年，我嘅生活豐富咗好多，人生嘅體驗亦充實咗。而且仲有機會參與電視節目嘅演出，呢段日子係我生命中最難忘嘅回憶，我會珍惜同感激大家對我嘅關懷同埋鼓勵。
  • 新嘅一屆香港小姐就快誕生，係香港回歸後嘅第一位香港小姐，意義更加深遠，我衷心祝福佢有璀璨嘅人生，同時為香港嘅安定繁榮共同努力，為社會帶嚟美好嘅明天。

1997年度冠軍：翁嘉穗

• 宣讀日期：1998年06月06日，香港國際機場
  • 當選特區成立後嘅第一位香港小姐，我感覺相當自豪，響呢一年內，我參與好多社會公益嘅活動，仲有機會演出好多電視節目，同時亦曾經多次前往海外推廣香港旅遊同埋工商貿易，呢啲咁難忘所在嘅人生經驗，將永遠留係我美好嘅回憶。
  • 今屆嘅香港小姐就快誕生啦，我衷心祝福佢，超越今日平凡，開展明日燦爛，擁有一個多姿多彩，光芒燦爛嘅人生，同時為香港帶來美好嘅明天。

1998年度冠軍：向海嵐

• 宣讀日期：1999年07月11日，紅磡香港體育館
  • 響當選香港小姐嘅一年裏面，我嘅生命可謂超越平凡，呢段日子裏面，響本地同埋海外參與咗好多社會公益活動，體驗人生嘅意義，好多謝無線電視比機會我演出電視劇集，以及主持特備節目，令我獲益良多，而我最榮幸嘅就係代表香港推廣旅遊同埋貿易，更加令我感受到作為香港市民一分子，熱愛香港，熱愛社群嘅使命。
  • 今屆香港小姐就快誕生，我衷心祝賀佢成為本世紀末嘅香港小姐，與香港共迎千禧，同創美好明天。

1999年度冠軍：郭羨妮

• 宣讀日期：2000年07月09日，紅磡香港體育館
  • 係我當選香港小姐之後，就展開咗我燦爛嘅人生，回顧過去一年，除咗能夠參與唔同嘅親善同公益活動，到世界各地去宣揚香港之外，仲有機會嘗試到演藝工作，係各種大型歌舞節目中，就好似今晚香港小姐大型歌舞參與演出，係今年年初，我更加當選成為國際華裔小姐冠軍，為我嘅人生寫下光輝的一頁，在我卸任嘅時刻，我衷心祝福新世紀第一位香港小姐，能夠延續世紀傳奇，和我一樣有一個璀璨美麗嘅人生。

2000年度冠軍：劉慧蘊

• 宣讀日期：2001年07月15日，紅磡香港體育館
  • 係過去一年香港小姐任期裏面，我嘅人生留下最美好嘅回憶，特別係擔任咗2000年悉尼奧運大使，親臨現場報導呢個國際體壇盛事，同時有機會主持唔少電視節目同埋參與社會公益活動，使我嘅生命更充實更有意義，新嘅一任香港小姐即將誕生，係呢度我衷心祝頌佢係呢個二千零一夜創造神話，你想成真盛會中，繼續延續香港小姐世紀傳奇，開創更光輝璀璨人生。

2001年度冠軍：楊思琦

• 宣讀日期：2002年08月11日，紅磡香港體育館
  • 係過去嘅一年，我度過左一個豐盛嘅人生同埋最值得難忘嘅日子，自從當選香港小姐之後，我履行咗香港親善大使呢個使命，除咗響海外協助推展香港旅遊經貿之外，我仲參與咗好多本地嘅社會公益活動，同時，多謝TVB，比好多機會我，使到我能夠參與幕前嘅演出，令我嘅人生更添姿彩。
  • 今日，香港人面對唔少考驗同挑戰，希望大家係困難嘅時刻能夠積極進取，團結奮鬥，衝破一切嘅患逆，迎接更美好嘅明天，到底，香港係我地嘅家，願與全港市民共冕，三十年完美盛事，新世代港姐有你更添意義，新一屆嘅香港小姐即將誕生，我響度衷心祝福佢，係未來嘅日子，繼續發揚香港小姐熱愛香港嘅精神，為香港作出更多嘅貢獻。

2002年度冠軍：林敏俐

• 宣讀日期：2003年08月23日，紅磡香港體育館
  • 係過去嘅一年，我履行咗香港小姐嘅使命，並參與過好多唔同類型電視節目嘅演出．特別係有機會係任內演出電視劇集，可以講係我既豐收又難忘嘅一年，行刻卸任的我，好快趣就要返返去美國，繼續我未完成嘅學業，心情當然係依依不捨，心繫香港，仍然為港，我會繼續係海外宣揚香港，希望將來學有所成，仲有機會為香港服務，臨別依依，我感激香港所有嘅朋友，係過去一年嚟，比我嘅支持同埋鼓勵，呢份真摯情意，深深印係我心底裏永致不忘，香港，我會永遠記住你，I Love Hong Kong Forever.
  • 新一屆嘅香港小姐即將誕生，係呢度，我衷心祝福當選嘅佳麗，秉承香港小姐服務社群嘅優良傳統精神，為迎眾社會心民心，建設美好明天，作出貢獻。

2003年度冠軍：曹敏莉

• 宣讀日期：2004年08月13日，將軍澳電視廣播城
  • 當選2003年度香港小姐，係我人生最榮幸同豐盛嘅一年，我不單止開始從事演藝工作，參與好多唔同類型嘅電視節目演出，仲出席本地同海內外嘅社會公益活動，使我生活體驗更加充實，人生視野更加寬闊，我會好珍惜呢一年嚟難忘嘅歲月，係未來嘅日子努力做到最好，繼續為香港服務。
  • 全球矚目嘅雅典奧運即將揭幕，新一屆接棒嘅香港小姐隨即投入奧運揭幕嘅主持行列，本地同國際兩大盛事連線接軌，意義非凡，我衷心祝福新誕生嘅香港小姐發揚更快、更遠、更高，力爭上游嘅奧運精神，為香港嘅福祉爭取更美好嘅明天。

2004年度冠軍：徐子珊

• 宣讀日期：2005年08月20日，紅磡香港體育館
  • 成長係一個過程，回首當選香港小姐嘅一年，係人生中最享受；亦係獲益良多嘅一個歷程。無論係代表香港到外地交流，又或者響本地參與慈善工作，我都得到不少嘅啟發。因此，我更積極去裝備自己，以及去面對各種艱辛嘅挑戰，希望香港小姐嘅形象能夠為時下嘅年青人樹立正面嘅榜樣。卸任在即，對一年來鼓勵、支持以及栽培我嘅朋友，我衷心銘感。我相信05年度嘅香港小姐會繼續將香港友善、好客嘅精神帶到世界各地之餘，亦能夠用愛去感染每一個香港人嘅心，我衷心祝福佢有一個美滿、豐盛嘅成長過程。

2005年度冠軍：葉翠翠

• 宣讀日期：2006年08月12日，紅磡香港體育館
  • 當選香港小姐，係我過去一年以嚟，最開心同埋最滿足嘅難忘事，係過往嘅一年，TVB安排我去到世界各地探訪咗好多老人中心、孤兒院、智障學校，以及南亞海嘯災區等等，令我深受感動，獲益良多，體會到世界上好多地方係好需要愛心同關懷。作為一位香港小姐，肩負起親善大使使命之外，將香港人嘅愛心發揚光大，伸延至海外有需要幫助嘅地方，係熱愛香港最好嘅具體行動。
  • 新一屆香港小姐即將誕生啦，響呢度我要送上最衷心、最真誠的祝福，祝願佢廣受愛戴同支持，繼續將香港人嘅善心、博愛精神嘅優良傳統弘揚四海。

2006年度冠軍：陳茵媺

• 宣讀日期：2007年07月21日，紅磡香港體育館
  • （粵語口讀）開心、自信心、決心同愛心，可以話係我當選香港小姐一年黎所經驗嘅一啲心路歷程，係任內，我有幸以港姐嘅身分代表香港到世界各地作親善嘅訪問，同埋慈善嘅活動，係短短唔夠一年嘅裏面，我經歷咗好多，通過與世界各地人士嘅接觸，令我嘅眼光擴闊咗，思想成熟咗，人生自然感到非常之充實，新一任港姐即將誕生啦，而我嘅人生又有一個新嘅起點，係度我衷心祝福今屆嘅冠軍，好似香港呢一顆東方明珠一樣，經過十年回歸嘅歷練之後，仍然繼續能夠不斷發光發亮，成為香港嘅驕傲。
  • （書面語）開心、自信心、決心和愛心，可以說是我當選香港小姐一年來所經驗的一些心路歷程，在任內，我有幸以香港小姐的身分代表香港到世界各地作親善訪問和慈善活動，在短短不夠一年裏面，我經歷了很多，通過與世界各地人士的接觸，令我的眼光擴闊咗，思想都成熟了，生活自然感到非常之充實，新一任港姐即將誕生啦，而我的人生又有一個新起點，在這裏我衷心祝福今屆的冠軍，好像香港這顆東方明珠一樣，經過十年回歸的歷練之後，仍然繼續能夠不斷發光發亮，成為香港的驕傲。

2007年度冠軍：張嘉兒

• 宣讀日期：2008年07月19日，香港會議展覽中心
  • 係過去嘅一年，對我黎講充滿咗滿足感同埋挑戰，履行香港小姐嘅責任之外，TVB仲俾咗好多珍貴嘅機會比我去探索世界，認識社群，今年我有機會參加好多慈善親善活動，深深感覺香港小姐對社區可以作出更多項奉獻，其中，令我最難忘嘅事，就係應香港貿易發展局去到莫斯科推廣香港設計既產品，為香港爭取更多商機同埋商譽，受到大會既贊許，另外，我亦都應香港旅遊發展局安排去到日本交流推廣，最近我亦都去咗鄭州探訪失明同埋貧困嘅同胞，幫助籌款改善佢地嘅生活，呢啲唔單止令我增廣見聞，更加增強咗個人自信心啊。
  • 我呢一年成長咗好多，我好感謝家人、朋友嘅支持同埋關心，我亦都特別感謝TVB既栽培，我會繼續努力工作，實踐去年參選港姐既志願，協助向市民宣傳健康生活及食品安全嘅知識，延續香港小姐既使命。

2008年度冠軍：張舒雅

• 決賽日期：2009年08月22日，地點：紅磡香港體育館
  • 鑑於2008年度冠軍張舒雅沒有履行香港小姐的職責而被無線電視雪藏及禁止為2009年度冠軍劉倩婷主持加冕儀式，所以並沒有發表卸任感言以及令2009年度香港小姐競選變成沒有上屆冠軍加冕的選美盛事，2009年度冠軍劉倩婷則由1977年香港小姐冠軍暨慧妍雅集永遠名譽會長朱玲玲小姐為其加冕，並在加冕前發表一段語重心長的感言：希望新一屆香港小姐可以參與國內及國際活動，推廣香港的優點，亦希望冠軍佳麗能以香港小姐的名銜多做善事工作，並祝福獲選佳麗冠軍名銜能為其帶來快樂以及在未來一年可以好好充實自己，而亞軍及季軍則由2008年度亞軍陳倩揚及季軍馬賽為其頒獎。

2009年度冠軍：劉倩婷

• 宣讀日期：2010年08月01日，紅磡香港體育館
  • 獲選為香港小姐冠軍係我人生嘅轉捩點，過去一年係我人生最充實嘅一年，我代表香港去到南非參加世界小姐競選，我亦去到世界各地進行親善訪問，宣傳香港，今晚我將會完成香港小姐嘅職責，以後我會堅持香港小姐嘅精神，繼續為社會作出貢獻，以我最熱愛嘅演藝，歌唱同舞蹈帶比大家歡樂，最後我非常多謝TVB比我嘅機會同栽培，亦多謝我家人同朋友比我嘅支持同鼓勵，我會繼續努力。

2010年度冠軍：陳庭欣

• 宣讀日期：2011年08月07日，將軍澳電視廣播城
  • 一段有意義嘅人生，離唔開不斷學習、進步同埋成長，回望充實嘅2010年，我擴闊咗視野，心靈變得更加富有，我履行左親善大使嘅使命，參與左好多慈善活動，將香港人嘅愛心傳揚開去，我非常珍惜同享受每一個工作機會，包括擔任司儀同埋主持，令我嘅人生加添色彩，忠心感謝TVB悉心嘅栽培，同時感謝我家人同朋友對我嘅支持同鼓勵，時間如流沙，係呢度我要對新一屆香港小姐獻上最真至嘅祝福，祝福佢係未來嘅日子會深受大家嘅愛戴，搵到自己嘅夢想，延續親善嘅精神，並將香港人積極行善同埋拼搏精神帶到世界每一個角落。

2011年度冠軍：朱晨麗

• 宣讀日期：2012年08月26日，將軍澳電視廣播城
  • 台上一分鐘，台下十年功，每一位成功人士嘅背後都付出咗汗水同努力，除咗不斷學習，仲要不斷進步，而我一直都係度奮鬥，回望過去豐富嘅一年，除咗擔任司儀同拍劇，我亦都履行慈善嘅重任，盡力幫助有需要嘅人，為社會出一分力。多謝TVB提供一個平台，去完成我嘅使命同夢想，亦都多謝一路以黎支持我嘅親人同朋友，我會繼續努力，令自己嘅人生寫下燦爛嘅一頁。時光飛逝，係呢度，我亦係度鼓勵新一屆嘅香港小姐，繼續努力，將愛宣揚落去。深深祝福佢地有一個美好嘅未來，繼續向自己嘅夢想進發，將愛傳送到世界每一個角落，為香港小姐繼承光輝嘅一頁。

2012年度冠軍：張名雅

• 宣讀日期：2013年09月01日，將軍澳電視廣播城
  • 每一個成功人士，都會付出努力同奮鬥，而我會繼續為自己嘅理想，不斷學習同進步，係呢一年裏面，我參與左好多慈善公益活動，幫助有需要嘅人，將愛心同關懷帶到每一個角落，每一項工作對我黎講，都係新嘅嘗試同挑戰，感激TVB為我安排唔同類型嘅表演，拍攝工作同埋擔任司儀，為我嘅人生添上悅目色彩，寫下光輝同美麗嘅一頁，亦都多謝愛護、支持我嘅屋企人同朋友，係呢度我祝福新一屆嘅香港小姐達成自己嘅夢想，繼續履行香港小姐嘅精神，將愛心宣揚開去。

2013年度冠軍：陳凱琳

• 宣讀日期：2014年08月31日，將軍澳電視廣播城
  • 光陰如流水，轉眼已經當選咗香港小姐一年啦！回顧過去一年嘅日子，工作過得非常之充實同埋有意義，除咗傳承及履行香港小姐嘅責任之外，重增長咗唔少嘅見聞，同埋認識咗好多新朋友，藉着今晚我想再一次多謝一直支持同鼓勵我嘅父母、前輩、朋友，同埋有分選我出嚟嘅你，更加要多謝公司對我嘅栽培同照顧，希望新一屆嘅香港小姐繼續傳承及履行香港小姐嘅責任，再次寫下光輝嘅一頁。

2014年度冠軍：邵珮詩

• 宣讀日期：2015年08月30日，將軍澳電視廣播城
  • 時光飛逝，當選咗香港小姐轉眼已經一年喇！回顧過去一年嘅日子，豐富咗我嘅見識，擴闊咗我嘅視野，所有工作亦都非常之有意義。我好珍惜同感恩有呢個機會，好開心呢啲經驗令我過得好充實，喺呢度我希望新一屆嘅香港小姐能夠傳承同履行香港小姐嘅責任，最後我藉住呢個機會要多謝我嘅家人、朋友、同支持我嘅人。更加要感激公司嘅栽培，令我由一粒細小嘅種子，變成可以綵放美麗嘅花朵。

2015年度冠軍：麥明詩

• 宣讀日期：2016年09月11日，將軍澳電視廣播城
  • （粵語口讀）一年前嘅今日，我喺哩度講過要「賢良淑德」，今日想加多一句：要「始終如一」。呢一年，港姐俾咗我好多千載難逢嘅機會，但同時俾我面對好多選擇同挑戰。係一個精彩嘅旅途，但都係一個磨練，磨練出賢明、良知、淑善同品德。呢啲經歷亦都鼓勵我要學習堅定，唔好爲別人忘掉自己，唔好被困難所折服；要毋忘初衷，一如既往。喺呢度想衷心多謝大家，係每一個嘅您，俾我可以企喺哩個舞臺上面成長，亦都祝願下一屆嘅香港小姐，能夠薪火相傳、青出於藍。
  • （書面語）一年前的今天，我在這裏說過要「賢良淑德」，今天想加多一句：要「始終如一」。 這一年，港姐給了我好多千載難逢的機會，但同時讓我面對很多選擇和挑戰。是一個精彩的旅途，但都是一個磨練，磨練出賢明、良知、淑善和品德。這些經歷亦鼓勵我要學習堅定，不要爲別人忘掉自己，不要被困難所折服；要毋忘初衷，要一如既往。我想衷心多謝大家，是每一個的您，讓我可以站在這個舞臺上成長，亦祝願下一屆的香港小姐，能夠薪火相傳、青出於藍。

2016年度冠軍：馮盈盈

• 宣讀日期：2017年09月03日，將軍澳電視廣播城
  • 踏上同一個舞台，今日我嘅身份已經唔同，喺過去呢一年，好感恩香港小姐讓我夢想成真，帶我踏上意想不到嘅精彩旅程，同時帶俾我磨練同成長嘅機會。
  • 每個人對美都有唔同嘅定義，我曾經希望可以爭取到所有人嘅認同，係香港小姐令我明白：只有學識欣賞同忠於自己，先可以流露出最自然、自信嘅美。
  • 喺往後嘅日子，我期望自己可以保持真我，真摯待人，即使面對逆境亦絕不低頭，迎難而上，喺度我祝願新一屆嘅香港小姐可以活出真我，閃耀出獨一無二嘅光芒，做最真實嘅自己，成為自己人生嘅贏家。

2017年度冠軍：雷莊𠒇

• 宣讀日期：2018年08月26日，將軍澳電視廣播城
  • 係過去一年對於我黎講，好值得紀念，我好多謝我嘅屋企人，朋友，同埋支持我嘅fans，我感恩，我經歷咗好多，學咗好多嘢，而且係呢個過程裏面，我認識咗我生命中最好嘅朋友，而家係我開始新生活嘅時候，我都會記得呢個咁精彩嘅旅程，係呢一度，我祝願新一屆香港小姐，可以發放更多正能量，令大家變得更加積極同自信。

2018年度冠軍：陳曉華

• 宣讀日期：2019年09月08日，將軍澳電視廣播城
  • 我好感激一年前嘅自己，參選咗香港小姐，亦都非常多謝係呢一年教過我嘅咁多位前輩，呢一年係充滿住挑戰同新事物，有時候，我都會好在意周圍嘅目光同評價，但係咁樣，反而會令到自己變得好沉重，所以呢一年，慢慢就學識聆聽自己內心嘅聲音，比起只係滿足其他人嘅期望更加重要，喺未來嘅日子，我希望繼續喺大家面前以輕盈嘅姿態去表演自己，係呢度，亦都祝願各位候選佳麗，喺將來嘅日子，繼續發光發亮。

2019年度冠軍：黃嘉雯

• 宣讀日期：2020年08月30日，將軍澳電視廣播城
  • 好多謝一年前嘅自己，勇敢踏上港姐呢個華麗舞台，令我嘅人生不斷進步、成長，同時話比自己知夢想從來唔係一個遙不可及嘅夢。夢，經過堅持同努力，最終都可以會成真，人生就好似一場接力賽，一場比賽嘅落幕，亦都代表另一場比賽嘅開始，回顧初衷，大家都向緊同一個目標進發，有人會行得快啲，有人又會行得慢啲，但我深信只要唔放棄，永不停步，最終大家都可以喺同一個終點相遇，最後，我衷心祝願下一屆香港小姐，接好代表香港呢一支接力棒，跑出璀璨亮麗嘅人生。

2020年度冠軍：謝嘉怡

• 宣讀日期：2021年09月12日，將軍澳電視廣播城
  • 係過去一年，我好似坐過山車一樣，一夜之間由蘇格蘭既護士變成香港小姐。呢一年，我人生好精彩，每日不斷有學習，挑戰，同埋進步既機會。吾知大家覺得我d廣東話有無叻左呢？我自己覺得麻麻地。不過多謝大家接受我，令我吾使重複用英文講多一次。多謝曬TVB俾我有機會做慈善活動，仲成為愛回家既一份子。我真係好享受呢一年既每一分鐘，亦都期待黎緊既日子繼續代表香港好好表現自己。最後，我祝願下一屆香港小姐keep住積極同自信，發放更多正能量。 Always remember，行多一步，to follow your dreams。

2021年度冠軍：宋宛穎

• 宣讀日期：2022年09月25日，紅磡香港體育館
  • 熟悉既音樂，不變既造夢舞台，感覺一切好似尋日發生一樣。系過去既一年，我覺得自己好幸運，因為香港小姐呢個夢想舞台，將我帶去更大更廣闊既世界，令我搵到屬於自己真正既舞台。香港小姐亦都令我明白女性既美唔限於外在，內外兼併，用愛證明生命既美麗，將愛散發到世界每一個角落。卸任在即，但我必定會帶住香港小姐既精神繼續將愛宣揚，將美麗綻放。今晚台上每一位勇敢既香港小姐即將展開一趟未知之旅，但係呢一種未知就係生命最美麗既地方。係呢度，衷心下一屆香港小姐能夠帶住呢一份衝勁，善良同愛心繼續走出屬於自己既美麗之路。

2022年度冠軍：林鈺洧

• 宣讀日期：2023年08月27日，將軍澳電視廣播城
  • 時光飛逝，轉眼間一年就過去啦，感覺尋日先至啱啱喺呢一個舞台上加冕。回望過去一年，參加過唔同既公益活動，令我增廣見聞，亦都接受過唔同既挑戰，令我更加堅強，更加相信自己。喺呢度，我非常感恩過去一年認識到既每一位，令我感到人生充滿著溫暖，即使卸任之後，我都一定將人間俾我既善良回饋社會，幫助更加多有需要既人。希望新一屆香港小姐美麗地活出自己精彩人生，秉承香港小姐精神，帶着一顆善良既心貢獻社會。

2023年度冠軍：莊子璇

• 宣讀日期：2024年09月15日，將軍澳電視廣播城
  • 人生就好似一場旅程，沿途會經過好多個站，而香港小姐呢個舞臺就係我最重要嘅中轉站，佢令我有機會去嘗試，去挑戰，去克服。每一個機遇都係來之不易，感恩每一位願意相信我，提攜我，同埋教導我嘅人。一年前我講過，希望成就更好嘅自己。一年後嘅今日，我想講多句﹕成就更好嘅自己，成功先會隨之而來。今日之後，我會以新人「莊子璇」嘅身份，踏上新一個旅程，繼續保持初心，令到每個瞬間都充滿意義，喺呢度亦祝願新一屆嘅香港小姐能夠展開獨一無二嘅旅程，學識 proud to be a woman 之餘，亦都學識 be proud of yourself。